التصنيف : الشعر (:::)
سيمون عيلوطي – فلسطين المحتلة (:::)
رابْطَه عا خَصِرْها مَرْيول
وْحامْلِه غِلاّيِةْ القهوِه
عا راسْها مَنْديلْها المَشْغول
بْألْوان أويا تِرْهِج ..
وتِضوي
هَالزّمن عَجْبينْها بْيْقول
شو كايْنِه بْأيّامْها ..
حِلْوِه
تْغنّي -ظريف الطّول- عَ الأرغول
حْكايِةْ بَلَدْنا وِجْها  يِروي،
عَالمَنْطَرَه  .. يَلاّ..
شَمِس أيْلول
وَهْجاتْها،.. إلْبيضَه رَحْ تِشْوي
فَيّاتْها يْخَلّو عُمُرْنا يْطول
يِشْفو غَليل القَلْب ..
هَالمَكْوي .
***
فِ عْيونْها يِهْدا البَحَر
وِيْثور
عَ خْدودْها شو ماجو موجاتو
مِشْتاقَه ي بْنَيي ..
لَهَالعصفور
تِرْجَع على الشُبّاك لُعْباتو
عْشوشو  حَدّ البيت..
عَالزّْرور
من دَغْشِه أصْحى مع نَغْماتو
شْوَيّةْ حَطَب وَلّف لَهَالتّنور
يا عيني ما أطْيَبْها ..
خُبْزاتو
قَدّيش خَضّرْنا الوَعْر البور
تِشْبَهْنا صارَت هيك ..
حَقْلاتو
غار القَمَر  … يا قَلْبي
صار يْدور
شُفْناهْ .. عَمْ بِيْبوس تَلاّتو
يْضُم الفراشِه مِنْ وَهَج هَالنّور
بْهَالجَنّه بين زْرار
وَرْداتو
طَلّ الصّبِح عَ كْرومنا
مَبْهور
تْغازِل عُيونو الحِلوِه
نَسْماتو
وْقوس القُزَح يَمّا
وِقِف مَسْحور
مِنْ وَرْدْنا وْألْوان ضِحْكاتو
جَنّاتْنا الفنّان هاوي
يْزور
مِن طيرْنا إلْهام غِنْواتو .
***
سَرْحَتْ، عِنيها بْعيد…
عَمْ بِتْجول
دَمْعاتْها إشْوَيّ رَحْ تِهْوي
بَتْذَكّر السّْجات مَدى لِسْهول
غير الهَنا …
عيشِتْنا ما تِحْوي
تْفَرْفِك إديها، بْحَسْره عَمْ بِتْقول:
بْأيّلمْنا لا شِرّ .. لا بلْوِه..
ما حَد قاتِل كان..
ولا مقتول
الموت زَمنْكو يُنْشُر وْيِرْمي،..
صَفْنَتْ وِهِيّ تْعَدّل المرْيول
وْمَرّه أخرى صَبّتْ القهوِهّ!!
————————–
( كُتِبت هذة القصيدة بعد زيارتي
لإحدى قُرى الجّليل الأعلى ولقائي
هذه المرأة المسنّة الفاضلة )