التصنيف : الشعر (:::)
سيمون عيلوطي – فلسطين المحتلة (:::)
– صورة 1- ألوان الورود
الإيد الجُبانِه الْ فَجّرت فيك البارود
وِالْ حاوَلَت تُقتل رُسومك وِالصّمود
راحْ تبقى غيمِه عاجزِه إنْها تِقَف
قْبال الغضب هَالجايي عا شِكْل الرّعود
صوت دَوّى قد أعوام الوَجَع
ظلام خَيّم حولنا مالو حُدود،..
صورة رسمها بْريشِتو ناجي العلي
وِمْلوّنِه ظلّت بِألوان الوُرود
توعد الأحباب بِالحِلْم الهَني
رسمك يا ناجي كْثير بيحقَق وُعود!!
* * *
– صورة 2- القدس وعدن
ناجي العلي
يا زهره راحْ تْظل
عَ شْفاف الزّمَن
يا نَرْجِس وْيا فُل
عً جْبين الوطَن
رسمك بِنورو هَل
أيام المِحَن
يجمع صُفوف الكل
مِ القدس وْعَدَن
ييجي وِيِمْحي الذّل
يِقضي عَ الفِتَن
يِهْدي لفاطمي* كُحْل
وْللجّاني كَفَنّ!!
***
– صورة 3- رجعة ناجي العلي
إنْت هُناك بْرِحْلِتَك
مْتَوّج بْتاج النّهار
شُفتك تِلاقي رِفْقِتَك
غسان *مع ماجد شرار
وْلما تِفيض مْحَبّتك
وِيْطول بِمَجْلِسْكو الحوار
وِتْصير أكيدِه رَجْعِتَك
مع رجعِة الأزهار
ساعتها تُهْدُر فِكْرِتَك
وِتْشِع من دايِر مَدار
عَ بْلاد منها رَوْعِتَك
ناسْها قَرّو قَرار
إنْهِن يِوَافّو مَوْعِدَك
تَطُل شَمْس الإنتصار
————————
• فاطمي: فاطمة- والدة ناجي العلي
• غسان: غسان كنفاني
(من مجموعة الشاعر “برقوق الجرمق”)