الرابط : القصة (:::)
سحر فوزي – مصر  (:::)
صوت غريب ينادى فى الشارع.. دفعها الفضول لمعرفة مصدره ..إندهشت عندما رأت من شرفتها (حاوى) يحمل صندوقا على ظهره ، ويدعو الأطفال لمشاهدة مافيه من صور وحكايات … حدثت نفسها قائلة : يااااه.. هو لسه فيه حاوى، وصندوق دنيا…عادت لتكمل عملها على جهاز الكمبيوتر ..فتحت نوافذها لتطل على العالم ..لفت إنتباهها عجائب البشر داخل هذا الجهاز العجيب، ضحكت وبدأت تنادى : قرب.. قرب.. قرب…تعالى وإتفرج عندنا..فى صندوق الدنيا حتلاقى طلباتك هنا … صداقات وآراء وتعليقات ..سخرية ونكت ..سخافات وتفاهات ..فيديوهات ومقالات.. قصص وروايات ، وسيرة الناس يحكوها فى حكايات ..قرب.. قرب.. قرب…عندنا هنا الإنجليزى المعرب ، وشباب فى الجامعة مابيعرفش يقرا ولا يكتب … وواحد سايب مراته وشغله وعياله، وقاعد يحب .. وللصبح اشعار فى حبيبته يألف ويكتب…  وواحد حاطط صورته بالمايوه.. وناس عماله تشكر في جماله وتكدب… وواحدة بتدور على عريس تعمل معاه شات.. يمكن يغلط وعليها يكتب..وناس بتخرب بيوت وتبعت رسايل .. قولوا يارب يخرب بيت كل اللى عمال فى بيوت الناس يخرب.. وناس بتتريق على كل حاجة.. وهى مش لاقية تاكل ولاتشرب…وواحد يبعت لك طلب صداقة ويقول لك النوع ذكر…تقعد تحكى معاه والآخر تكتشف إنه كان عليك بيكدب…طبيخ وحلويات… لغاية لما المعدة تقلب … قرب ..قرب.. قرب..عندنا هنا فن وسياسة وشعر وأدب … أدعية وأذكاروكلام من دهب… إلهى ماتروح بيتك سليم ياللى ماتعمل لهم شير…اللى بيحب النبى يعمل شير …وكمان إعملوا شير…إنتبهت من ندائها على صوت زوجها يوقظها من نومها …تفلت على يسارها ثلاث ،وهى تستعيذ من شر صندوق الدنيا ، وشر المستخبى فى صندوق الدنيا؟!!
بقلم / سحر فوزى /كاتبة وقاصة مصرية