الرابط : القصة (::::)
سحر فوزي – مصر (:::)
نظرت إليه فى دهشة شديدة ، ولم تنطق بكلمة واحدة…عندما كانت تصغى إلى أوامره التى بدأها بعد إنتهاء شهرالعسل بساعات..حدثها وقد كشّر عن أنيابه قائلا:  أنا خارج مع أ صحابى ، وإحتمال أتأخر….إذا فكرت إنك تزورى أمك.. إتصلى بىّ الأول…وإذا نزلت لشراء حاجات للبيت.. إلبسى فستان واسع ، وبكم….وما تنسيش تغطى راسك …إوعى يبان منك حته …..وأبقى أمشى بسرعة وما تتلكعيش…وما تكلميش حد غريب… وإوعى تفكرى تركبى تاكس لوحدك…. إياك تروحى لصحبتك ..إنت عارفة أن تصرفاتها ما بتعجبنيش….إذا إتأخرت.. إنت حرة….وبحذرك من دخول شقة الجيران ..لأن عندهم ولاد كبار..ومفيش داعى للرغى فى التليفون.. عشان ما أتفاجئش بمكالمات زيادة….وما تنسيش تطفى النور.. فواتير الكهرباء بقت نار… وإقفلى الباب عليكي كويس ، وما تفتحيش لحد إلا لما تبصى فى العين السحرية الأول..على الله تقعدى على النت …وصحيح : ما تنسيش تحطى العيش فى الفريزر ..وإبقى إغسلى لى شرباتى ، وركبى زراير القميص ، وأكوى البدل والتيشرتات والترنجات…وياريت تحشى لنا حلة محشى أصل  الجو (بارد قوى) ،ولازم تعملى حسابك إنى لما أرجع البيت ألاقيكى مستنيانى
وفجأة سألها : أيه النظرات الغريبة دى؟ ما بترديش علىّ ليه؟!
قالت له:كنت أنتظر زواجنا بفارغ الصبر..هربا من تحكمات وأوامر والدى ،وبحثا عن راحتى و حريتى المنشودة ، واليوم فقط إكتشفت أننى قد (تزوجت أبى)!
بقلم / سحر فوزى
/ كاتبة وقاصة مصرية / 19 /1 /2013